饿鬼分田螺

作者：几两

六月四，夜头也非常燠热，村上人都中意到晒坪上坐凉。晒坪清净，阔，有几块大石头可以坐凉；晒坪边有条水圳，去水圳洗凉也方便。我等一帮囝儿在晒坪走来走去。牛肉四伯穿领大屈头裤，手上拿把葵叶扇，在晒坪边坐凉。四伯蛮识讲古，小囝儿中意听。“四伯，讲个古来听呢！”

四伯开始讲古，这回讲“饿鬼分田螺”，一帮囝儿围在四伯左右前后，听讲古：

发时，某人去照鱼，出到田垌外头，天墨墨黑，什么都无见，亦无见别人出来照鱼。佢拿着火笼，在田垌啊，圳边啊，转转去去，逛来逛去，逛了蛮久，怪咯，连个鱼影都无见，连田螺都无见粒。又过了蛮久，佢见得几条火一熠一熠，好像系别人亦在田垌上照鱼。天有些乌蒙乌蒙，好快就天光了。隔着两块田，佢见到那几人好像是分物件，你一份我一份，在讲话。佢远远见到人影，见到身，无见头，无讲是碰到鬼？无理得哽多，佢大声吆“有无？有我份无？”佢哽一吆，那几条人影倏然无见了。佢捏死胆行过那边田基，田基上摆了三堆田螺。三头饿鬼分田螺，着佢大声吆吓走了。

四伯的古讲罢，一帮囝开始谈论“四伯，明夜我等也大声吆，有田螺分哦！”

讲古罢场，各归自己屋。一路上，我都惊有鬼跟尾，吓死人咯。

后记：这是用青龙土话写成。